Sept. 5, 2019
Japan te khuapi nihna ahi Yokohama ah passenger 500 a pua meileng khat leh mawtawpi khat kitaih kha in, mi khat si a, 34 liam uh hi. Mawtawpi pen a munah kuang pah hi. Meileng ahileh dei thum teng a lampi panin kia suk hi.
Hih tuahsuatna pen tuni Thursday a thupiang ahihi.
Passenger khat in NHK thupuakte khiangah hibangin gen hi. “Limlangh kitam ging ka zaak ciangin nasia lua ahihmanin ka um ngam kei liang hi. A denciangin ka khua daak leh meileng mailam teng khempeuh na sia cip khin hi” ci hi.
Kum 60 a pha meileng hawlpa pen a munah si pah hi. Numei khat zong lim liam mahmah hi. A dangte ahileh lim liam lua lo uh cih ding hi.
NHK thupuakte genna ah meileng hawlpa in a maia mawtawpi a muh ciangin a brake siik pah hi. Ahizongin ziakai kha ahihmanin siatna lianpi a piang ahihi ci hi. Mawtawpi in mehteh mehgah leh singgah theipuam vive pua a, meileng tawh a kitaih khak ciangin kang pah hi. A van puak teng khempeuh lampi dungah bua khia phengphang hi ciin a muna mute’n gen uh hi.
