Melbourne pan a hong pai campers nihte sawtpi a kizon khit uh ciangin amau mawtaw 4WD sungah a sisa in kimu hi. Khat pen Caleb Forbes hiin kum 22 pha a, khatzaw pen Shannon Lowden, kum 21pha hi. Amau nih ii luang hawm pen Friday, 13 September 2019 nai 11am hunin kimu hi. A mawtaw kimuhna pen lampi tawh a kigamlatna munah hiin, banghangin tua mun tung hiam cih a kikan laitak ahihi.
Hih mi nihte pen nung Friday niin Gippsland gam sung zuanin a pai khia uh ahihi. A mawtaw uh 1994 Nissan Patrol pen Thomsom Dam panin 5kms a kigamlatna munah Aeriel vision tawh kimu lai hi.
Mr Forbes pen nasep hun a hong kuan loh ciangin mite patau pah uh hi. Amah pen Lowe Electrical ah Sunday leh Monday a nasem dingin a kiseh ahihi. Inn a tun theih loh ciangin a innkuanpihte leh midang 100 in Baw Baw National Park sung teng zon kipan pah uh hi. Kaal khat sung bang a kimu lo khin a hi uh hi.
